О нас

Колектив ЯКП „Водовод и канализация” Нови Сад ма 11 сектори у чиїх рамикох вельочислени служби хтори вєдно дїйствую же би цала система функционовала и виполньовала цилї дїлованя, а виполнюємє их дзекуюци, насампредз:

искуству у дїялносци, хторе зберане децениями, а хторе хасновательом улїва довириє до роботи нашого подприємства,
стаємному анґажованю на ширеню водоводней и канализацийней мрежи и шицких инших активносцох хтори нєобходни за окончованє основней дїялносци,
оптималному анґажованю розполагаюцих ресурсох и потенциялох и
стаємному провадзеню и применьованю модерних спознаньох у рамикох дїялносци.

Подруче дїйствованя ЯКП „Водовод и канализация” Нови Сад облапя город Нови Сад и пригородски населєня Сримску Каменїцу, Сримски Карловци, Петроварадин, Поповицу, Параґово, Лединци (стари и нови), Чардак, Буковац, Ченей, Кисач, Кать, Ковиль, Руменку, Будисаву, Степановичево, Футоґ и Ветерник.

ВОДОВОД

Гражданох Нового Саду ше подмирює з воду за пице зоз трох жридлох хтори експлоатую под̓жемни води, а то „Воєне острово”, „Петроварадинска ада” и „Штранд”. Сирову воду хтора приходзи зоз жридла по длугоких цивоводох вельких пречнїкох ше прерабя у Фабрики води на Слунковим кею. Технолоґийни третман сировей води по квалитет санитарно исправней води за пице, як цо то предписане зоз Правилнїком о исправносци води за пице, предходзи три фази, до хторих уключена аерация, филтрованє и дезинфекция.

У новосадскей дистрибутивней системи єст вкупно петнац резервоари води за пице рижних велькосцох и наменки, а воду за пице каждодньово доставаю вецей як 135.000 ґаздовства у Новим Садзе и околних населєньох. До системи ше у каждей секунди дистрибуує коло 1.500 литри води, а дньово город и пригородски населєня троша медзи 100 и 105 милиони литри води, з винїмком лєтней сезони, кед ше трошенє води звекшує за дзешец до петнац одсто.

На початку 2016. року, почали робиц и нови блоки у Фабрики води „Штранд”, цо була историйна преламна хвилька у розвою комуналней системи Нового Саду. Нови технолоґийни процес значел и доградзованє уж постояцей технолоґиї, а з уградзованьом филтерових польох з активним угльом и озонизаторами, микробиолоґийна и физично-хемийна исправносц води у Новим Саду дзвигнута на найвекши можлїви уровень.

Продукция квалитетней води за пице и подмирйованє жительох з исправну воду то основа на хторей ше снує нашо подприємство. Числени статистични податки еминентних институцийох шведоча о сполньованю високих стандардох у обласци продукциї и дистрибуциї води, та з гордосцу можеме повесц, же новосадска вода єдна з найквалитетнєйших водох за пице у Войводини.

Воду за пице з нашей дистрибутивней мрежи ше класує як воду хтору мож хасновац каждодьово, без пошлїдкох на здравє людзох, бо вона нє обтерхована з високима концентрациями минералох. Шицки параметри хтори ше одредзує у води за пице предвидзени зоз Правилнїком о гиґиєнскей исправносци води за пице, хтори як правни Акт идентификує параметри и предписує їх максимални дошлєбодзени концентрациї (MДК). Воду з нашей Фабрики води и дистрибутивней мрежи ше каждодньово контролує и шицки параметри у складзе зоз МДК вредносцами. Твардосц новосадскей води коло 15 dH (нємецки ступень твардосци) и вона охарактеризована як штреднє тварда вода.

КАНАЛИЗАЦИЯ

Нєшкайша канализацийна система териториї Нового Саду, хтору твори канализацийна система городу Нового Саду и системи канализациї хаснованей води з пригородских населєньох, преставя заєднїцку – общу систему каналованя, хтора по єдинственей системи источашнє одводзи хасновани одрутни води зоз ґаздовствох и индустриї, як и атмосферски паданя. Моментално з канализацийну мрежу закрите скоро 95% териториї городу, а длугока є коло 1.200 километери. Новосадска канализация ма вецей як 80 пумпни станїци до хторих уградзени вецей як 150 пумпи хтори у каждим моменту оперативни. Моментално, мали построєня за преробок одрутней води єст у Ковилю, Руменки и Степановичеве, а Городска управа за будовательну жем и инвестициї пририхтує документацию проєкту за Ченей и Беґеч, чийо ше будованє очекує у будучносци.

Вибудов централного построєня за пречисцованє одрутних водох у Новим Садзе, найзначнєйшей и найдрагшей инвестициї у историї городу, планована за 2021. рок, а у составе того проєкту ше хвильково роби на вибудови новей пумпней станїци NGC1. Обєкт NGC1 будзе опремени з двойнїстима шитками, з векшима и финшима, так же ше будзе одстраньовац шицки тварди часточки з пречнїком векшим як 6 mm, та вода хтора ше будзе улївац до Дунаю, а на месце нового улїву, будзе практично без одруткох. Попри вибудови NGC1, планує ше и вибудов колектора ґу централному пречисцовачу у чиїм составе концепциї потребне же би ше злїв над каналом ДТД – Клиса по єдним цивоводу одводзел през канал и так доводзел по NGC1.

Вибудов централного пречисцовача барз длугоки процес, преважно пре обсяжну документацию, медзитим, кед ше нє вежнє до огляду почасово инциденти, одрутни води хтори ше тераз випущує до Дунаю задоволюю предписаня, цо потвердзує и Институт за явне здравє Войводини.